ऑस्टिओआर्थरायटिस – गुडघेदुखी, वेदना आणि आत्मविश्वास

नेहमीच्या सततच्या गुडघेदुखीचा कंटाळा आला आहे…

हे वाक्य मी रोज ऐकतो… आणि खरं सांगू का? ही वेदना फक्त गुडघ्यांत नसते… ती मनात, आत्मविश्वासात आणि कुटुंबाच्या आनंदात शिरलेली असते.

गुडघा दुखतो म्हणजे फक्त “चालता येत नाही” असं नसतं… गुडघा दुखतो म्हणजे पिकनिकचा आनंद कमी होतो, देवदर्शनाचा उत्साह संपतो, नातवंडांबरोबर खेळता येत नाही, चार पायऱ्या चढतानाच जीव कासावीस होतो आणि मनात एक प्रश्न उभा राहतो —“आता माझं जगणं फक्त वेदनेतच जाणार का?”

ही गोष्ट एका कुटुंबाची…

साधारण साठीतले आई-वडील, त्यांची मुले आणि नातवंडं… नववर्षाची सुट्टी, सगळं कुटुंब एकत्र. घरात आनंदाचं वातावरण — “पिकनिकला जाऊया!”

“रिसॉर्टला जाऊ!”… हसणं, गप्पा, प्लॅनिंग… तेवढ्यात वडील म्हणाले — “आधी देवदर्शनाला गडावर जाऊया… मग पिकनिक.”

सगळे आनंदी… पण एक गोष्ट कुणाच्याही लक्षात आली नाही —त्या आईची गुडघेदुखी.

आई काही बोलली नाही… कारण तिला माहित होतं — “मी नाही म्हटलं तर घरचे नाराज होतील.” ती हसली… आणि म्हणाली — “हो… चला जाऊया.”

पण तिच्या मनात एकच भीती होती — “मी नाही गेले तर सगळ्यांचा आनंद बिघडेल… आणि गेले तर वेदना मला आनंद घेऊ देणार नाहीत…”

मित्र हो… ही स्टोरी नाही… हा प्रसंग प्रत्येक घरात घडतो.

ऑस्टिओआर्थरायटिस म्हणजे काय?

ऑस्टिओआर्थरायटिस म्हणजे गुडघ्याच्या सांध्यातीलकार्टिलेज (cushion) हळूहळू झिजणे. हे कुशन कमी झालं की हाडं एकमेकांवर घासली जातात, सूज येते, वेदना वाढतात, चालताना त्रास होतो, बसून उठताना कळ येते आणि जिना चढणं अवघड होतं.